إمبارح كان عمري عشرين..

إمبارح كان عمري عشرين..

اول مرة امسك قلمي و فعلا نفسي اتكلم بلساني .. مصري ،، فعلا نفسي اكتب مش عشان أبهرج قصاصاتي و اتمنظر بالتشبيهات و الكلام العربي الفصيح !!..

حبيبة اخدتني النهردة عشان توريني ان كل اللي كنت ناسياهم عملولي مفاجأة ، قالت لي فكك من الجينز اللي واخد عقلك ده :) ، و اول مرة البس فستان و احس اني مش متضايقة .. احس اني بنت و افكني من الغلاف "المسترجل" اللي انا عايشة فيه ده .. النهردة و لأول مرة من فترة كبيرة اوي اوووي اوووي .. افتح بقي عشان الكلام يطلع ,, و اضحك ، و ميطلعش =D
"مع اني اكتر انسانة رغاية ممكن اي حد يعرفها :P"

إمبارح كان عمري عشرين ، امبارح كنت فاكرة اني و لا حاجة . اني مجرد فرد اخر في المجتمع يعيش و يتعايش بس، كنت فاكرة زي كل مرة هاقضي عيدميلادي في بلد و اصحابي في بلد ، اتصل بصاحباتي اللي مش جنبي و اقولهم قد ايه كان نفسي يبقوا معايا و انا بمثل يعني قال ايه مش فارقة معايا ان محدش افتكر عيدملادي غير عشان انا قلت !!
إمبارح كنت فاكرة ان اختي مبيفرقش معاها اني ساذجة و بعاني اني احاول افهم الدنيا و افهم نفسي انا عاوزة ايه ، صحيح قدام الناس هي الصغيرة بس في عيني دايما كل حاجة بتقولها بتهمني يمكن عشان في طفولتي كانت كل حاجة ليا ، و صراحة يمكن بحس ان عمري من عمرها .. إمبارح كنت فاكرة ان كل الناس عندها اهم مني ،، لأني انا تحصيل حاصل موجودة على طول .. النهردة عرفت ان " ليس كل ما يُشعَر به ينطق "
إمبارح كنت فاكرة ان ماما عمرها ما هتفهمني ، عمرها ما هتحب تعرف اصحابي.. تعرف مين الناس اللي معاها في حياتي .. و كنت فاكرة ان ماحدش في قرايبي او اصحابي فاهم ايه اللي معقدني دايما من عيدميلادي ،، ليه انا بكرهه !!..
مش عشان بكره اكبر و اعجز زي باقي البنات ، لأ ده عشان العكس تماما !!.. عشان عمري ما بكبر او بعجز من جوه !!

كل يوم و التاني ببص لنفسي في المراية و اسرح في ملامحي ، مش زي البنات اللي بتقعد تتأكد ان جمالها " لا تشوبه شائبة" و لا زي البنات اللي تتحسر و تقول لو بس عنيا اوسع شوية ، او لو بس خدودي حمرا سِنّة.. لأ .. بسرح لأن كل مرة ببص بتغير ، كل يوم بحسني بكبر و يوم بحسني اصغر ، و يوم بحس عنيا فيها حكمة زايفة .. حكمة مش فيا فعلا !!
إمبارح كان عمري عشرين ، و كنت حاسة اني 13و 14 بالكتير 16 سنة. امبارح كنت عايشة في عالم تاني في سن تاني .. على اني لسة طفلة بتطل على اول ايام المراهقة ، بمثل اني كبيرة .. بمثل اني سعاد حسني في صغيرة على الحب !! في كل يوم و كل موقف كنت تمثيلية صغيرة ، ضحكتي المبهرجة ،، تنطيطي اللي ملهوش لزوم .. عفويتي ،، و ما ادراكم ما هي عفويتي !!!!

عنادي و غباوتي و تمردي على الأعراف و القوانين و القيل و القال و اكبر طظ في كلام الناس ،، إمبارح كنت بتلذذ بعبدالحليم عشان اقنع نفسي ان العادي اني ابقى مراهقة و انا على اعتاب سن الرشد ، عشان احلل لنفسي اسرح و فكري كله يضيع مع انغامه على جبار ،، و اسيب نفسي لـ انا لك على طول :)
إمبارح كنت بعشق فيروز، عشان ادي لنفسي سبب احب ، و ادي لنفسي مسببات عشان الاقي في الكون الفاني ده شغف يملا عيني ، عشان ماحسش اني زي ما رحت في الدنيا زي ما جيت . فيروز اديتني صباحي و مسائي.. فيروز اديتني سبب للتوحد ، للبعد و النقم على كل نشاط ممكن يقربني من اي مخلوق تاني مش شبهي . اديتني العذر عشان ابدأ مدونة اهيم فيها على وجهي و احاكي الناس بحب قديم و ضحكة سكيرة و
همسات منسية .. و انسى الناس اللي حوليا ، انسى اصحابي انسى قرايبي و اعيش ويا قلمي ..

إمبارح كان نفسي ابقى حاجات كتيرة ، امبارح اشتريت جيتار و حملت مقاطع من اليوتيوب عشان اتعلم مؤقتا و عملت لستة عشان الكورسات ، امبارح كنت عاوزة اتعلم اتكلم ايطالي و اسباني و فرنسي ، امبارح جبت كاميرا و صورت كل حاجة عجبتني عشان اشيلها معايا في شنطتي في كل حتة .. امبارح عشقت الكمان ، سرحت على الحانه الحزينة و افتكرت كل لحظة وجعتني في يوم و بس !!.. ما جبتش كمان !!
إمبارح كنت فاكرة اني لازم اتكلم في السياسة عشان اكون مثقفة و اقرا و اقرا و اقرا ، و بقيت هوايتي واجب عليا مش فرحتي و لا تفريغ شحناتي !.. بقى قلمي إدانتي !!.. نسيت ليه كنت عاوزة كل الحاجات دي و جريت ورا مظهري العام ، لكن النهردة .. بصيت لقيتكم كلكم بتحبوني كدا ، من غير سياسة ، من غير جيتار ، من غير رقص باليه و لا كاراتيه .. يبقى ازاي تحبوني كدا و انا مش حباني ؟؟..حطيت لستتي على جنب ، مش عاوزة اركب موتوسيكل ولا اجرب كل حاجة في الدنيا عشان ارضى عن نفسي . شيلت جيتاري على جنب عشان يملاه التراب و اعتزلت ارائي السياسية المجردة من الواقع و عدت الى فيروز مع القليل القهوة و قلم ذو طرف سلس و مجرد ورقة !!

إمبارح .. كنت عيلة ،، طفلة بريئة مغمضة ، و النهردة فتحت عنيا على ناس طلعت كانت على طول فكراني بس مبتقولش زيي كل حاجة ، لأني انا بس اللي في قلبي على لساني .. و الناس كلها اللي في قلبها اقوال مش افعال ..
إمبارح كنت بفرح اوي لما حد يجيبلي هدية ، حتى لو انا نفسي مبطلبش ، مش عشان مادية والله ، بس كنت بفتكر انها الطريقة اللي ممكن حد يعبرلي بيها على مقدار معزتي بجد ، و يمكن في ذات الوقت تبقى حاجة تفكرني بحد بحبه الى الابد ، النهردة بقى .. انا مش عاوزة هدايا ، النهردة ذكراكم بس لوحدها هدية .. و وجودكم في حياتي دلوقتي يعني ان كل لحظة منها ذكرى ، يعني ان كل لحظة منها هدية ,, و ان انتم "اهلي و اصحابي" اكبر هدية جتني من ربنا في عيدميلادي ال 21 .. !!

إمبارح كان البعيد عن العين بعيد عن القلب . اما النهردة بقى ، اللي اتحفر جوه قلبي مرة و لا اي ريح في الدنيا تقدر تطير حروفه من قلبي ..
إمبارح كان عمري عشرين ..
و بيكم بس ، النهردة بقيت واحد و عشرين ..
و انتوا كل لحظاتي ، كل ذكرياتي كل سنواتي الواحد وعشرين =)

الى كل ما عرفني و عرف هفواتي و اخطائي و لا زال يقف الى جواري و سيطل بجواري مهما طالت بنا الدروب =) ربنا يخليكم ليا

الى كل من سألني : ما احساسك بعد وصولك سن الرشد ؟
اقول .. فاضللي سلمتين و اوصل :P
بس الى ذلك الحين .. مليني بيكم الرضا :)
و كل سنة و انا طيبة =D

august 5th,2010