موضوع لن أفهمه أبدا... حاولت بشتى الطرق ان اقتنع به و لكن لا فائدة ... لا أفهم منطلق ان يأتي شاب لا اعرفه و لا يعرف عني سوى "وضعي الاجتماعي" ماذا تعمل والدتي و ماذا يعمل والدي و ما شهادتي العلمية و فقط !! يأتي ليطلب يدي لأقاسمه حياته و سنوات عمره القادمة كلها ! و لربما تكون أيضا المرة التي يأتي فيها لخطبتي هي المرة الأولى التي يراني فيها... و لكنني برغم عدم فهمي فأنا كنت متقبلة لإختيارات من حولي المتعلقة بهذا الشأن طالما لا يَمُتّ لي بأي بصلة.
المهم، تجيبوني يمين تجيبوني شمال لن أرضى بأقل من علاقة حب شغوفة جنونية لتقودني الى قفص الزواج =) و لكنني أيضا لا أحبذ قصاصات المراهقة الفارغة التي يعبث بمعانيها العابثون فيتركون الحب كمفهوم أجوف و ينزعون عنه قدسيته !!
الخلاصة !! انا زهقت و معنديش حلول :D
لا ده طريق آمان و لا ده طريق آمان ... لغاية ما واحدة صاحبتي بتكلمني بتقوللي انها اكتشفت ان الصالونات خدعة ! " أخيرا، اللي برغي في م الصبح حد اقتنع بيه ، الحمدلله يا رب أنقذت واحدة " :D و كان هذا الحديث الجاري ما بيننا =)
هي : انا اكتشفت ان اسلوب حياة البنت واخلاقها وتفكيرها عمرهم ما بتعرفوا من قعدات الصالوناااااااااااااااااااااااااات و لو ظهروا مش بيقى اوووي كله بيبان بعد الخطوبة
العلاقات الانسانية بتمر ب 3 مراحل
المجاملة
الاكتشاف
المعرفة الحقيقية
" ثم يأتي القرار بالرحيل او الاستمرار"
في الصالونات بيبقى غالبا كلها اقنعة و بتقع في معدل شهور قليلة و ما بيفضلش مكانها غير الألم و الحسرة
أنا : بصي يا ست الكل انا بطلت افكر في الحاجات دي و مركزة على نفسي و اللي انا عاوزاه ف حياتي و عملت طرح من المعادلة ان فيه رجالة في الكون اصلا و العلاقة اللي بتربطنا بهذي الكائنات العجيبة
و هسجل كورس بوكسينج هابتديه من اول الاسبوع القادم و فاكة نفسي تماما و سايباها علىا لله
الحب "شنكلة"
الحب الحقيقي فعلا مابيجيش بالتفكير و اللا العقل و اللا المنطق بييجي شنكلة
فأنا عايشة حياتي لغاية ما ربنا يريد و اتشنكل
و في النفس الوقت مش هابقى هبلة و عبيطة اتشنكل في واحد مواصفاته ماتنطبقش على مواصفاتي فنقضي كل يوم في حياتنا في نكد !! الشخصية هي اللي بتركب الأول و بعدين الشكل الخارجي و بعدين المستوى الاجتماعي...
و الشخصية دي بتتضمن مستواه الفكري، و خفة روحه و كل حاجة البنت بتتصدم فيها بعد الجواز لأنها مبتفتكرش انها مهمة جنب مظهره الخارجي و مستواه الاجتماعي بس في الأصل شخصيته دي هي الروح اللي هتعيشي معاها كل لحظة في تكوينك من أول ما توعدي بأنك تديله نفسك !! و ده وعد كبير أوي البنات مش فاهماه !!
البنات فاكرة ان الجواز هو القفص الدهبي و الفارس على الحصان الابيض و الرومانسية و الولاد فاكرين انه البنت هي اللي بتشنكلهم للقفص ده لأن هي اللي عاوزة الاستقرار، فيما ان يا سيدتي الفاضلة في معجمي العكس هو الصحيح ... يعني الولاد مفهمنا كدا ان احنا بنشنكلهم عشان ما تاخديش بالك ان هم اللي محتاجين واحدة تاخد بالها منهم :D و محتاجين حضن الأنثى يحتويهم بعيد عن قسوة الحياة و هم الطرف الوحيد الكسبان في عملية شنكلة الجواز دي :D :D
في الواقع الراجل من غيرنا بيبقى تايه و شخص عاجز لا يفقه سوى في العمل زي الماكنة او الانسان الآلي :D من اول ما بيتولد و هو متعود على والدته تطبخله و تغسله و تكوي له ، عشان كدا حياة الأعزب بتبقى كركبة و لخبطة لأنه عاجز من غير أنثى الشغل مبيدلهوش السعادة اللي متوقعها ، فبيدور على واحدة تغنيه عن حب أمه و حب الحبيبة و واحدة تملك حياته و ترتب الكركبة اللي هو عاجز عن السيطرة عليها :D ده غير انها كمان بتديله من ذوقها و ثقافتها و حبها للحياة بتديله روح تانية
في الحقيقة يا سيدتي الفاضلة احنا بيتم الإيقاع بنا باسم الحب عشان تبقى ام تطبخ و تهتم بيه بدل امه و زوجة تراعي شؤونه و أنثى تغدق عليه من حنانها و رومانسيتها فيما انه هو ماتخرجيش مع صحباتك زي الاول عشان هو ليه متطلبات و راجع م الشغل طهقان و كل شوية رايحة فين جاية منين بتكلمي مين و عاوزة تسافري مع صاحباتك ليه؟ و انت مالكيش خروج بعيد عني و لما ابقى افضالك بقى :D :D
صدقيني هو مش هيحس بالقيد قدك، فالقفص ليكي مش ليه ! احنا في مجتمع سايب الراجل براحته في جميع حالاته الاجتماعية و مقيد البنت و خادعها في ان الجواز هيريحها فيما انه مقلب من الرجالة
بس مقلب ليه مميزاته "لما فعلا تلاقي الانسان الصح و تاخدي وقتك في انك تدرسيه مش تحدفي نفسك قدام اول شاحنة عملاقة عشان المجتمع بيضغط عليكي يا تتجوزي ده يا ممكن ميجلكيش احسن منه و تعنسي !! او في جملة مشهورة بتقولك " من كتر خطابها بارت " !!
بس الى حين ما ييجي الشخص الصح اللي يشنكلني بقى انا مبفكرش في حاجة
لغاية ما ييجي الوقت ده هاعيش حياتي بالطول و العرض " فيما لا يخالف شرع الله :D “ عشان محدش يفهمني غلط بس !
أحَمّل فيديوهات من اليوتيوب لكورسات يوغا و تانجو ... و هارقص و هعرف اجيب التوازن في حياتي :D و هاعمل كل اللي نفسي فيه و اللي المجتمع فاكره مالوش لازمة بس هو ليه لازمة لأنه هيبقى جزء من تكويني أنا
كدا و اللا كدا الجواز قيد !! هيقيد حريتي مش زي ما البنات فاكرة انها تتجوز عشان تخلص من قيود اهلها
فأنا ناوية اعيش حياتي و شبابي قبل ما ييجي واحد يكتم على نفسي
o
و ده مش معناه انه هيكتم على نفسي بمعنى وحش =) بالعكس انا هابقى قد المسؤولية أكتر كمان لأني هكون واخداه عن اقتناع عقلي و قلبي =) و مالي عيني بس فعلا الناس فاهمين الجواز غلط و واخدينه على انه لعبة او متنفس يمكن =) لكن الجواز ده معناه انك مش مجرد تحبي حد، لأ ده معناه انك هتبني جزء من مجتمع هل انتي وصلت للحكمة اللي تكفيكي تبقى قد مسؤولية مشاركة المجتمع بجزء منك مش بس في اولادك ان شاء الله ، لأ في كمان شريك حياتك كل تفصيل زغير فيه هيبقى منه مشاركة وجدانيه منك =) و المسؤلية بطبيعتها قيد و أمانة ، ما بيحسش بوجودها غير الساذجين و الغير ناضجين =) و انا عاوزة علاقة ناضجة أكبّرها و أنَميها بحبي ليه =)
انا مش رافضة الجواز و لو جه لي حد صالونات انا مش " هاكرشه" زي ما كل صحباتي فاكرين... انا هاديله فرصه يثبت نفسه عشان محدش يقول عليا ديكتاتورية بس مش هابقى محبذة السكة دي لأنها في نظري باردة و خالية من العفوية البشرية اللي بتبقى زي الكهربا في أول معرفة اي اتنين ببعض بس ابقى عملت اللي عليا و سايبة فرصه لقلبي يتشنكل من الجهة اللي عاجباه انا بس كل اللي عملته انه شلت الموضوع من تفكيري و ركزت ع الحاجة الصح اللي مش هيبقالي فرصة اركز عليها لو حصل و اتجوزت الحاجة دي هي أنا
أنا أهم =) و مش هاضيع وقتي مستنية طيف حد لسه ماجاش و مش وقته
أنا مش هاستنى حاجة تاني، و لو حاجة نفسي فيها هاعملها ... لأن انا استاهل مني كدا =)
لازم تقدري نفسك و تدي قيمة لروحك عشان لما " عريس الغفلة " يقرر ييجي يقدرك
هو هيشوفك على حسب ما انت مقيمة نفسك و محدش بيحب حد مش بيحب نفسه عشان كدا انا هخليني كل حاجة تبسطني في اللي انا عاوزاه :D عشان يبقى هو كل حاجة تبسطني
هي : أيــــــــــــــــــــــــــــــــــــــوه بقى :D
شنكلة هه ;)
أنا : بس انا عجبني الكلام اللي انا كاتباه ده و عاوزة احط جزء منه على الصفحة بتاعتي
فاجئت نفسي والله صدق اللي قال خذوا الحكمة م افواه المجانين:P
هي : و انا بحب فيكي جنونك :D
انا : عن نفسي بحب جنوني بس يا رب اللي هيكتم على نفسي يحبه هو كمان عشان الموضوع على قد ما بيبسط البنات بيخض الجنس الاخر شوية
هي : لا تقلقي هيحبه على ضمانتي
انا : و يبقى بيلبس بنطلونات كاكي و سويتر V neck زي الواد الأمور في الصورة اللي وريتهالك :D :D
هي : يا شاطرة لو مش بيلبس انتي لبسيه ;)
انا : تعجبيني لما تفهمي أساليب حواء الملتوية :D
*********************************
ملحوظة أخيرة بقى عشان اللي مبيعرفش يقرا بين السطرين :P
البنت مش زي ما المجتمع عاوز يفهمنا كائن عاجز محتاج حد جنبه دايما :) لأ في سيدات أثبتوا للعالم جدارتهم في جميع المجالات :) بس بحكم الطبيعة البشرية اكيد لأنك حواء اتخلقتي من ضلع مسيرك في يوم تحتاج أدم عشان تنتمي ليه :) كإنتماء :) يعني جزء كبير بتكميله زي ما بيكملك :)
بس برضه هم بيحتاجونا اكتر ;) بدليل ان الست تعرف تشتغل و برضه تحافظ على باقي تفاصيل حياتها في البيت و الراجل ميعرفش :P و تعرف تبقى أم و زوجة و كذا لقب إداري كبير في بعض في شركة :D بس ثقوا في نفسكوا و خدي بالك ما تنساقيش ورا البربرق الكتير في واحد متقدملك من غير ما تختبري شخصيته و توافقها معاكي :) و مدى ثقته فيكي و مدى إعتزازه باستقلاليتك :)
"العريس اللقطة" مش مجرد واد أمور و خريج كلية مرموقة و بيكسب قد كدا :) لأ الشخص اللي فعلا يستاهلك هو اللي يراعي ربنا فيكي قبل كل حاجة :) و يتفهمك كإنسانة و ما يتكسفش انه يحتويكي... و انه يعترف باحتياجه ليكي ما يقللش من رجولته :)
لو لقيتي كدا .... فكك من كل حاجة قلتها عن عيشي حياتك بالطول و العرض و تعالي على نفسك و اتشنكلي في قفصه هو :P و ربنا يديم المعروف و على الله يطمر :P
بس افتكري ... يا عزيزتي هم محتاجيننا اكتر ;) و إحنا اللي مكبرين دماغنا بس <3
المشاركات
